වරකා ගස

එකමත් එක කාලෙක සරුසාර ගමක හරිම කරුණාවන්ත ගමරාළ කෙනෙක් ජීවත් වුණා. මේ ගමරාළට
පලතුරු, ධාන්‍ය වර්ග පිරුණු ගොඩාක් සරුසාර වත්තක් තිබුණා. මේ වත්තේ කොනක තිබුණා හතර
වටේටම සුවඳ විහිදෙන රසම රස ගෙඩි ගොඩාක් හැදුණු උස පැණි වරකා ගහක්.
ඔන්න ඉතින් දවසක් ගමරාළ මේ වරකා ගහෙන් ඉදුණු ගෙඩියක් කඩා ගන්න හිතලා ගහ ගාවට ගියා. ගහ
ළඟට ගියපු ගමරාළට පෙනුනා කවුරු නමුත් ගහේ අත්තක් උඩ ඉන්නවා කියලා.
ඉතින් හරිම කුතුහලයෙන් ගමරාළ මෙහෙම ඇහුවා. “කවුද ඔය මගේ ගහ උඩ ඉන්නේ? ඔහේ මොනවද
ඔතන කරන්නේ?”
එතකොට ගහ උඩින් මෙහෙම උත්තරයක් දුන්නා.
“මම තමා මේ ගහට අරක් ගත්ත යකා. මේ ගහේ ගෙඩි අයිති මටයි. ඒ නිසා මම ආවේ මේ ගහේ ගෙඩි
කන්න.”
ගමරාළ නම් ජීවිතේට වරකා ගස්වලට අරක් ගත්ත යක්ෂයෙක් ගැන අහලා තිබ්බෙ නෑ. ඉතින් මේ ගැන
සැකයක් ආපු ගමරාළ ගහ උඩ ඉන්නෙ ඇත්තටම යකෙක්ද කියලා බලා ගන්න උපායක් කල්පනා කළා.
වටේට තිබුණු වේලුණු දර කෝටු ටිකක් එකතු කරගත්ත ගමරාළ වරකා ගහ යට ගිනි ගොඩක් ගැහුවා.
ඊට පස්සෙ දුම සැරට එන්න ඒ ගිනිගොඩට වේළුණු මිරිස් කරල් කිහිපයකුත් දැම්මා.
අර ගිනි ගොඩෙන් ආපු දුම පිරිලා කාට උනත් තවත් ගහ උඩට වෙලා ඉන්න නම් පුලුවන් උනේ නෑ. හොඳටම
කහිමින්, කිවිසුම් අරිමින් යකා ගහෙන් බිමට බැස්සා.
එතකොට තමයි ගමරාළ දැක්කේ ඒ යකෙක් නෙවෙයි රස වරකා ගෙඩියක් කන්න හොරෙන් ගහට නැගපු
තමන්ගේ අසල්වැසියෙක් කියලා.
ලැජ්ජවට පත්වුණු අසල්වැසියා ගමරාළගෙන් සමාව ගත්තා. තමන්ගේ අසල්වැසියා අවංකවම පසුතැවෙන
බව දැකපු කරුණාවන්ත ගමරාළ ඔහුට සමාව දීලා වරකා පලුවකුත් දුන්නා. ඊට පස්සෙ ඒ පලුවේ ඇට වලින්
වරකා පැල හදා ගන්න හැටිත් කියලා දුන්නා.

0:00